Sulmet e Rusisë në Ukrainë, përveç shumë shteteve të Evropës do t’i sjellin problem ekonomike edhe vendit tonë, si në rritjen e çmimit të naftës, gazit, energjisë elektrike, drithërave, rritja e materialit ndërtimorë, e të tjera, shkruan InLajmi.
E kjo normalisht se do ta thellojë edhe më shumë krizën ekonomike që është tani për tani në vend.
Njohësi i çështjeve të ekonomisë, Mustafë Kadriaj në një prononcim për Gazetën InLajmi, tha se tanimë që lufta Rusi-Ukrainë nuk është më konflikt i izoluar, padyshim se pritet që të ketë pasoja gjeopolitike dhe ekonomike edhe në vendin tonë.
“Në rastin e Kosovës padyshim se do të ketë pasoja për faktin që Kosova si një vend importues që është, ndikimi është evident dhe frika është që në javët në vijim mund të ketë rritje të vazhdueshme të çmimeve që do e rëndojnë më tutje jetën e qytetarit. Po ashtu do të ketë ndikim në mjetet e trustit të investuara jashtë vendit që në rast të krizave botërore bien aksionet”,tha Kadriaj.
Tutje, ai ka kërkuar nga Qeveria që të lejojnë tërheqjen e një pjesë të trustit pasi që do të rriste në vend fuqinë blerëse dhe po ashtu do të ndihmonte qytetarët.
“Potencialisht do të ketë humbje të mjeteve të investuara që uroj që në këtë drejtim të reflektoj qeveria që një përqindje të mjeteve të trustit t’i tërheqin qytetarët duke rritur fuqinë blerëse njëherit do të rritet likuiditeti financiar në vend po ashtu gjasat për rritje ekonomike janë shumë të vogla sepse investitorët hezitojnë në rast të krizave. Po ashtu Kosova cilësohet si vend jo i sigurt ku dihet që ne ende kemi konflikt të hapur me shtetin serb”,theksoi Kadriaj.
Se a duhet të shqetësohen qytetarët për “fryrje të çmimeve” a do të ketë import të mjaftueshëm të gjërave ushqimore, Kadriaj dha këtë përgjigje.
“Vlerësoj që nuk ka nevojë për panikë në aspekt të sigurisë ndërsa se sa do të ketë rritje të çmimeve vlerësoj që ne si shtet importues do të jemi më të atakuarit sidomos në konsum të derivative, ku ka gjasa për ngritje të çmimeve”,theksoi Kadriaj./InLajmi/
