Në uebfaqen e tij, autoriteti shtetëror ukrainas i trafikut ajror tha se hapësira ajrore e vendit është mbyllur për fluturime civile duke filluar nga ora 00:45 të enjten dhe se shërbimet e trafikut ajror janë pezulluar
Agjencia Evropiane për Sigurinë e Aviacionit tha se hapësira ajrore në Rusi dhe Bjellorusi, në rreze prej 100 miljesh detare nga kufijtë e tyre me Ukrainën, gjithashtu mund të paraqesë rrezik për sigurinë.
“Në veçanti, ka rrezik për shënjestrim të qëllimshëm dhe identifikim të gabuar të aeroplanëve civilë”, tha kjo agjenci, shkruan Reuters.
“Prania dhe përdorimi i mundshëm i një laryshie të madhe të sistemeve luftarake tokësore dhe ajrore paraqet rrezik të lartë për fluturimet civile që operojnë në të gjitha lartësitë dhe nivelet e fluturimeve”, thuhet më tej në njoftim, tranmeton Gazeta Blic.
Kjo agjenci tha se Ministria e Mbrojtjes e Rusisë i ka dërguar Ukrainës mesazh urgjent për ta paralajmëruar për rrezik të lartë ndaj sigurisë së fluturimeve për shkak të përdorimit të armëve dhe pajisjeve ushtarake nga ora 00:45 dhe se ka kërkuar nga autoriteti ukrainas për kontrollimin e trafikut ajror që t’i ndalë fluturimet.
