Ish-ambasadori i Kosovës në Bullgari, Edon Cana, situatën e krijuar së fundmi në Ukrainë e ka cilësuar si dramatike, duke shtuar se arkitektura e sigurisë në Evropë ka ndryshuar përgjithmonë.
Sipas tij, Evropa e Rusia kanë hyre në një konflikt, që është i planifikuar me kujdes nga ana e Rusisë dhe se Rusia e di çka do, ndërsa Evropa nuk e di deri ku mund të shkojë.
“Shihet që Putini planin e ka që fillimisht t’i marrë këto 2 krahina separatiste që kontrollohen nga Rusia, e cila tani po e luan një lojë që do ta provokojë një luftë më të gjerë në Ukrainë”.
“Mënyra e veprimit të Rusisë është përsëritje e veprimit të tyre që e kanë bërë në Gjeorgji, pra s’është hera e parë që kanë bërë kështu. Ripërsëritje e skenarit. Inskenohet kinse ndonjë krizë, ku minoriteti rus është i rrezikuar dhe kërkojnë që të mbrohen, e Rusia vjen aty që t’i mbrojë. Tani po e bëjnë të njëjtin skenar në Ukrainë”.
“Mendoj që armiku më i madh i Putinit është demokracia dhe ai kërkon që të rrethohet nga njerëz ose shtetet si Bjellorusia, që e kanë një autokrat, pra një kukull, të cilin Putin e kontrollon”, deklaroi Cana në emisionin ‘Info Magazine’ në Klan Kosova.
Ish-ambasadori i Kosovës shtoi se plani afatgjatë i Putinit është jo pushtimi klasik i Ukrainës, por ndërrimi i pushtetit në Ukrainë në një regjim që do të jetë në shërbim të Rusisë dhe se qëllimi përfundimtar do të jetë krijimi i një Ukraine që do t’u shërbejë interesave të Rusisë.
