Anëtari i Kryesisë së LDK-së, Shkëmb Manaj, gjatë një konference të mbajtur për media ka thënë se LDK-ja e konsideron shqetësuese vonesën për funksionalizimin e Organit Shqyrtues të Prokurimit Publik (OShP), Autoritetit Kosovar të Konkurrencës (AKK), si dhe Bordit të Komisionit të Pavarur të Medieve (KPM), raporton InLajmi.
Manaj tha se në kohën kur Kosova po përballet me rritje të çmimeve, mosfunksionalizimi i Autoritetit Kosovar të Konkurrencës ndikon që këto çmime të rriten ne kundërshtim me legjislacionin në fuqi.
“Qeveria e Kosovës ka lënë jashtë funksionit, për afër një vit, organe të rëndësishme si Organi Shqyrtues i Prokurimit Publik, Autoriteti Kosovar të Konkurrencës si dhe Bordin e KPM-së”.
Ai në emër të LDK-së ka kërkuar nga Qeveria e Kosovës të ndalin praktikën e mosfunksionalizimit.
“Vonesa për mosfunksionalizimin e këtyre institucioneve është tentim për kapje dhe politizim të këtyre organeve. Në të njëjtën situatë ka ndodh edhe konkurrenca për emërimin për kryetar të Bordit të KPM-së.Në këtë situatë të rënduar socio-ekonomike, shtrenjtimit të energjisë dhe produkteve ushqimore, kërkojmë nga Qeveria dhe shumica parlamentare të ndalin praktikën e mosfunksionalizimit”, tha Manaj./InLajmi/
