Kreu i Aleancës për Ardhmërinë e Kosovës, Ramush Haradinaj, këtë të hënë ka deklaruar se e përkrahë idenë e propozuar nga një deputet i PDK-së, Bekim Haxhiu dhe disa ekspertë të ekonomisë për tërheqjen e 20% të kursimeve pensionale, përcjell InLajmi.
Haradinaj ka kërkuar që të lejohen të tërhiqen këto mjete sidomos për faktin se dihet në çfarë situate të vështirë ekonomike po jetojmë.
Kjo bazuar në shtrenjtimin e produkteve bazike ushqimore , energjisë elektrike e shumë produkte të tjera.
E përveç kësaj mase që parashihet si një zgjidhje jo afatgjate, Haradinaj ka propozuar nga Qeveria që të aprovojë edhe masa të tjera.
Postimi i plotë i tij:
Të lejohen qytetarët që të tërheqin mjete nga Trusti
Qytetarët në Kosovë janë në një situatë tejet të vështirë ekonomike e sociale. Shtrenjtimi i artikujve elementarë për jetesë, ka shtyer shumë kategori që të përballen gjithnjë e më shpesh me mbijetesën ekonomike. Prandaj e konsideroj si hap të parë urgjent, aprovimin e një vendimi që lejon qytetarët të tërheqin një përqindje të caktuar të mjeteve nga trusti pensional.
Situata është e jashtëzakonshme, prandaj edhe vendimet duhet të jenë të jashtëzakonshme. Natyrisht krahas kësaj mase, qeveria duhet të mendojë edhe për masa të tjera, në këtë kohë vështirë të përballueshme për qytetarët./InLajmi/
