Pas 3 muaj e gjysmë pauzë nesër do të takohen në Bruksel, drejtori i Zyrës për Kosovë, Petar Petkoviq dhe zëvendëskryeministri i Kosovës, Besnik Bislimi për të vazhduar tutje procesin e bisedimeve në kuadër të dialogut Kosovë-Serbi, raporton InLajmi.
Shefi i Grupit Parlamentarë të PDK-së, Abelard Tahiri tha se Qeveria e Kosovës është jashtëzakonisht jo transparente në këtë proces.
“Raportimet nga kjo qeveri i kemi pasur vetëm kur i kemi kërkuar ne. Do duhet të diskutohej në parlamentin e Kosovës, me shoqëritë civile, me krerët politik në mënyrë që krejt palët të japin kontributin e duhur. Qeveria e Kosovës është jashtëzakonisht jo transparente në këtë proces. Sot ,sikur ne ashtu edhe qytetarët shumë pak dimë për angazhimin e Qeverisë në dialogun Kosovë – Serbi”,tha Tahiri në një konferencë për media të mbajtur këtë të hënë.
E në këtë proces deri më tash, Tahiri tha se nuk është parë ndonjë progres në favor të Kosovës.
“Nuk mund të flas për draftin e një marrëveshje të cilën nuk e kemi parë. Do të shohim në të ardhmen, por para se të ndodhë kjo Qeveria e Kosovës duhet të diskutojë. Ka ide, por ka edhe veprime të cilat nuk po i shohim që po shkojnë në favorin e Kosovës”,tha më tej Tahiri.
Ai theksoi faktin se Serbia ka lëshuar targat e shtetit të tij për komunat ku jetojnë serbët në Kosovë, derisa përmendi edhe vendimin e ZRRE-së, ku kjo e fundit i anashkalon serbët nga pagesa e energjisë.
Në anën tjetër nga vendimi i fundit i ZRRE-së për shtrenjtimin e energjisë elektrike, qytetarët e tjerë të vendit po e paguajnë energjinë me shtrenjtim, vendim ky i marrë së fundmi. /InLajmi/
