Pas 3 muaj e gjysmë pauzë, krerët e shtetit të Republikës së Kosovës dhe Serbisë do t’i rikthehen nesër procesit të dialogut në Bruksel, shkruan InLajmi.
Se a pritet të ketë marrëveshje nga këto bisedime, analisti politik, Blerim Burjani në një prononcim për Gazetën InLajmi, është shprehur pesimist se do të ketë ndonjë marrëveshje në favor të Kosovës.
“Gjasat janë shumë të vogla apo më mirë të themi se s’do të ketë gjasa që të arrihen marrëveshje nëse mund të themi në favor të Kosovës. Deri më tash, pra nga fillimi e deri më tash dialogu i udhëhequr nga Bashkimi Evropian nuk ka sjellë të dëshiruarën. Në këtë dialog mund të them se ka pasur shkëmbime idesh në mes të palëve por jo shkëmbime idesh dhe largim nga dialogu. Ky dialog ka dështuar përfundimisht”, tha Burjani.
E nëse vazhdon me këtë avaz procesi i dialogut, gjegjësisht BE nuk harton një rekomandim të gjerë se çfarë duhet të përmbajë marrëveshja përfundimtare, Burjani thotë se do të jetë thjesht humbje kohe.
“Serbisë i konvenon status-quoja, pritje të rrethanave tjera të favorshme historike për të nëse ndonjëherë vinë. Nuk do të ketë marrëveshje po ashtu sepse Serbia nuk mund ta pranoj se e ka humbur Kosovën dhe pas kësaj vazhdojnë takime siç kanë qenë deri më tash, thjesht takime koti”,tha Burjani për Gazetën InLajmi.
Tutje, sipas tij perëndimi duhet ta kuptoj se Serbia nuk bën negociata për humbjen.
“Po e ritheksoj se i tërë ky angazhim perëndimor është i kotë me u marrë me Serbinë”,tha ai./InLajmi/
