Presidentja e Republikës së Kosovës, Vjosa Osmani, po zhvillon takime me liderë shtetëror dhe të organizatave ndërkombëtare, në kuadër të Konferencës për Siguri në Mynih, përcjell InLajmi.
Osmani së fundmi ka takuar presidentin e Letonisë, Egils Levits, ku ka shfrytëzuar rastin ta falendëroi për përkrahjen e vazhdueshme karshi shtetit të Kosovës, ndërsa edhe në këtë takim pjesë e diskutimit ishte tensioni i krijuar në mes të Ukrainës dhe Rusisë.
Ndërsa tutje është diskutuar për të ardhmen euro-atlantike të shtetit të Kosovës, duke shprehur se shteti i Letonisë do ta përkrahe shtetin e kosovës edhe në këtë drejtim.
Njoftimi i plotë nga Zyra e Presidencës:
Presidentja Osmani takoi presidentin e Letonisë, Egils Levits
Në vazhdim të takimeve me liderë shtetëror dhe të organizatave ndërkombëtare, në margjina të Konferencës për Siguri në Mynih, Presidentja Osmani u takua me presidentin e Letonisë, Egils Levits. Presidentja Osmani ka falënderuar presidentin Levits për përkrahjen e vazhdueshme që Letonia ka ofruar për Republikën e Kosovës. Në këtë takim, u diskutua lidhur me situatën aktuale në Ukrainë, dhe ndikimin e saj në shtetet baltike dhe ato të Ballkanit Perëndimor. Presidentja Osmani ka theksuar se Rusia në vazhdimësi ka synuar dhe synon edhe destabilizimin e Ballkanit.
Ndër të tjera, në këtë takim mes dy presidentëve u diskutua edhe për të ardhmen euro-atlantike të Republikës së Kosovës, dhe mënyrat se si Letonia mund ta përkrahë shtetin tonë në këtë drejtim. Nga Letonia u kërkua përkrahje në procesin e liberalizimit të vizave, përmes diskutimeve me shtetet anëtare, të cilat mund të kenë hezitime për këtë proces.
Presidentja Osmani tha se shtetet baltike shërbejnë si një shembull i mirë për t’u ndjekur dhe se Republika e Kosovës do të vazhdoj ndërmarrjen e hapave konkret për ta avancuar statusin e vet në integrimin e mëtejshëm në strukturat euro-atlantike. /InLajmi/
