Presidentja e Republikës së Kosovës, Vjosa Osmani, po zhvillon takime në kuadër të Konferencës për Siguri në Mynih, përcjell InLajmi.
Gjatë këtij takimi presidentja ka diskutuar më pjesëmarrësit e kësaj konferencë, ku temë diskutimi ishin sfidat dhe angazhimet për demokraci në Evropë.
Osmani është shprehur e shqetësuar për zhvillimet e fundit në mes të Rusisë dhe Ukrainës, duke cekur faktin qe demokracia e një shteti është shtylla kryesor.
Njoftimi i plotë i Zyrës së Presidencës:
Presidentja Osmani diskutoi në Konferencën për Siguri në Mynih në panelin për angazhimin për demokraci
Në kuadër të Konferencës për Siguri në Mynih, Presidentja e Republikës së Kosovës, Vjosa Osmani sot ka diskutuar si paneliste lidhur me sfidat dhe angazhimin për demokraci në Evropë. Përveç Presidentes Osmani, në këtë panel kanë diskutuar edhe Kryeministrja e Estonisë Kaja Kallas dhe liderja e opozitës në Bjellorusi Sviatlana Tsikhanouskaya.
Presidentja Osmani foli për rëndësinë e demokracisë nga perspektiva e vendit, i cili ka sakrifikuar shumë për ta arritur lirinë dhe pavarësinë.
Në diskutimin e saj, Presidentja Osmani shfaqi shqetësimin për zhvillimet në rajon, ndikimin rus në Ballkanin Perëndimor dhe tendencat destabilizuese që vijnë nga aleati i Rusisë, Serbia.
Më tej, presidentja Osmani ka theksuar se demokracia është një shtyllë kyçe në përpjekjet shtetndërtuese të Republikës së Kosovës, sikurse edhe shtyllë qendrore e zhvillimit të shoqërisë në vendin tonë. Tutje, Presidentja Osmani ka folur për sfidat me të cilat përballen shoqëritë demokratike, si dhe mënyrat se si mund të tejkalohen ato.
Presidentja Osmani tha se suksesi i përbashkët arrihet nëpërmjet garantimit të të drejtave të njeriut, kundërshtimit të pushteteve autoritare nëpër botë dhe bashkëpunimit të ngushtë ndërmjet popujve demokratik. Ajo përmendi edhe Samitin për Demokraci dhe zotimet e Republikës së Kosovës në këtë Samit, të cilat do ta avancojnë edhe më tej demokracinë në vend. /InLajmi/
