A e dini se në Katar mbahen çdo vit garat me Deve?!

Me “Qatar Camel Festival” që mbahet në kryeqytetin Doha, Katari dëshiron të arrijë një sërë synimesh si mbajtja gjallë e traditës dhe ringjallja e turizmit duke zgjedhur devenë më të bukur.

Festivali, i cili filloi më 28 janar me pjesëmarrjen e konkurrentëve të fortë nga vendet e Gjirit do të zgjasë deri më 8 mars.

Një total prej 47 milionë rialësh (rreth 13 milionë dollarë) do t’u jepen fituesve të garave të zhvilluara në rajonin Shahaniyyah, 25 kilometra larg kryeqytetit Doha.

Gjatë 40 ditëve që do të vazhdojë festivali, do të shfaqen devetë “Asayil” (deve e egër), “Mejahim” (deve e zezë dhe e madhe) dhe “Megatir” (deveja e bardhë) nga vendet e Gjirit si dhe nga Katari, në 114 gara të veçanta, 54 nga të cilat janë vendase dhe 60 janë ndërkombëtare.

Objektivi: Të mbajmë gjallë traditën, të ringjallim turizmin

Me Festivalin e Devesë synohet të mbrohet trashëgimia kulturore dhe racat e deveve si dhe të krijohet një platformë që bashkon pronarët e deveve dhe të ndërgjegjësojë brezat e rinj për të mbajtur gjallë traditën.

Devetë, të cilat kanë qenë ndihmësit më të mëdhenj të arabëve gjatë historisë për nga gjeografia ku jetojnë, sot shërbejnë edhe për zhvillimin e turizmit kulturor dhe rigjallërimin e ekonomisë.

Në një prononcim për Anadolu Agency (AA), kryetari i Komisionit të Mediave të Festivalit, Mohammed bin Selan el-Merri tha se ndryshe nga festivalet e mëparshme, këtë vit garuan 3 raca të ndryshme devesh në të njëjtën kohë dhe vend dhe si e tillë festivali është bërë i privilegjuar nga festivalet e tjera në rajon.

Merri tha se garat do të zhvillohen në dy grupe të veçanta, vendase dhe të huaja, në mënyrë që pronarët e deveve të Katarit të kenë përvojë.

Shpërblime të shumta, pjesëmarrje e lartë

Duke theksuar se niveli i pjesëmarrjes në festivalin e pezulluar prej më shumë se një viti për shkak të COVID-19, këtë vit është më i lartë krahasuar me vitet e tjera, Merri theksoi se në këtë luajnë rol edhe çmimet e larta të ofruara.

Merri tha se në festival, përveç Katarit pritës, marrin pjesë edhe Arabia Saudite, Kuvajti, Emiratet e Bashkuara Arabe (EBA) dhe Omani.

Ai tha se në festival ka deve të veçanta arabe ndërsa konkurrenca po rritet dita-ditës dhe se kjo garë do të arrijë kulmin në ditët në vijim kur do të garojnë devetë Asayil.