Njohës të çështjeve ekonomike në Kosovë, si dhe deputeti i Partisë Demokratike të Kosovës, Bekim Haxhiu ditë më parë i kanë propozuar Qeverisë së Kosovës t’ua mundësojë qytetarëve edhe një tërheqje nga Fondi Pensional, prej 20%, shkruan InLajmi.
Krejt kjo sipas tyre do ta zbuste sadopak situatën e vështirë financiare aktuale, po ashtu do të ndikonte në rritjen e konsumit dhe ngjalljen e aktivitetit ekonomik te bizneset.
Behxhet Shala, nga Këshilli për Mbrojtjen e Drejtave dhe Lirive të Njeriut (KMDLNJ) në një prononcim për Gazetën InLajmi lidhur me tërheqjen e 20% nga Fondi Pensional tha se nuk është zgjidhje afatgjate.
“Nuk është zgjidhje afatgjate, ndoshta është një ‘infuzion’ i vogël. Pra, paratë e qytetarëve që kanë kursyer me vite tu ndahen për ta zbutur gjendjen e rëndë ekonomike që e ka kapluar vendin, si pasojë e shtrnjtimeve duke filluar nga energjia e zinxhirë tek produktet e tjera. Kjo nuk ka logjikë ekonomike por as logjikë tjetër”,tha Shala./InLajmi/
