Kreu i PSD-së, Dardan Molliqaj e ka quajtur kryeministrin Albin Kurti ‘kryeministër i dezinformimit’, duke thënë se në fjalimin e tij të pavarësisë u sulmuan mediat dhe kundërshtarët politikë për dezinformim, përcjell InLajmi.
Molliqaj theksoi se kryeminstri Kurti keqpërdori datën për të përvjedhur propagandën sepse edhe fjalimi i tij nuk është thirrje për ndriçimin e të vërtetave, por krijimin e një të vërtete zyrtare.
Ai tha se lajmet e rreme po krijohen nga Qeveria Kurti, rast konkret e përmendi ngritjen e çmimit të energjisë elektrike, të cilën e cilëson si tendencë për mashtrim, mirëpo sipas Molliqaj kjo nuk i shkoi gjatë.
Gjithashtu kreu i PSD-së tha se Kurti me nevojën për t’u dukur demokrat zbuloi tendencat për ta kontrolluar hapërsiren që buron nga qytetaria dhe mediat e lira.
Postimi i plotë i tij:
Kryeministër i dezinfromimit.
Në Fjalimin e Pavarësisë (2022) u sulmuan mediat dhe kundërshtarët politik për dezinformim (fakenews). Keqpërdori datën për ta përvjedhur propagandën. Kjo kërkesa për korrektësi duhet dekonstruktuar. Fjalimi nuk ishte thirrje për ndriçimin e të vërtetave, por krijimin e një të vërtete zyrtare. Pra, a nuk është duke u implikuar një e vërtetë e vetme, dhe çdo gjë tjetër është dezinformim?
Gjysmë të vërtetat enden gjithandej, por ato nuk i rregullon dot Qeveria. Në anën tjetër, pa mediat e lira në vend të kërkesave për rritje pagash, do të ishim duke e ngrënë idilikën e “mrekullisë ekonomike” të Qeverisë që na tregon se u rrit eksporti, por nuk na thotë sa u rriten importet.
Të drejtën për fjalën e lirë as nuk e marrim e as nuk e jep një autoritet nga sipër. Liria dhe të drejtat na takojnë dhe nuk na duhet garancë për ushtrimin e tyre. Nevoja për t’u dukur demokrat zbuloi tendencën për ta kontrolluar edhe hapësirën që buron nga qytetaria dhe mediat e lira. Në fakt, lajmet e rreme po prodhohen nga kjo Qeveri. Rritja e çmimit të energjisë është rasti i fundit i tendecës për mashtrim, që nuk i shkoi gjatë. Paramendoni nëse nuk do të kishte media të lira dhe protesta qytetare? E vërteta zyrtare do të lulëzonte, apo jo? /InLajmi/
