Të mërkurën mbrëma ka vdekur një 9-vjeçare në Klinikën e Pediatrisë në Qendrën Klinike dhe Universitare të Kosovës, përcjell InLajmi.
Siç njoftoi Policia e Kosovës, nëna e saj raportoi pasi dyshoi se nga neglizhenca e mjekëve ka ndërruar jetë vajza e saj 9 vjeçe.
Klinika e Pediatrisë nëpërmjet një njoftimi bën të ditur se nga ana e tyre nuk pati neglizhencë.
“Klinika e Pediatrisë sqaron se fëmiu fillimisht ishte pranuar në Repartin Covid-19, për shkak se ka rezultuar pozitiv për COVID. Pas ekzaminimeve shtesë vërtetohet se fëmiu ka sëmundje të rëndë akute dhe për këtë njoftohen prindërit. Më pëlqimin, aprovimin dhe nënshkrimin e prindërve, fëmiu fillon terapinë dhe trajtimin e nevojshëm. Klinika e Pediatrisë sqaron se nuk ka pasur neglizhencë në trajtimin e fëmiut. Për çdo veprim, analizë, procedurë diagnostike dhe fillimin e terapisë për sëmundjen e rëndë akute janë njoftuar prindërit, është marrë pëlqimi dhe nënshkrimi i tyre”.
Tutje, thuhet se janë duke pritur rezultatet e obduksionit dhe do të bashkëpunojnë për hulumtimin e rastit.
“Tashmë, jemi në pritje të rezultatit nga Mjekësisë Ligjore. Klinika e Pediatrisë, do të ofrojë gjithë bashkëpunimin e nevojshëm për hulumtimin e rastit nga organet kompetente”, thuhet në sqarimin e tyre./InLajmi/
