Shefi i Grupit Parlamentarë të AAK-së, Besnik Tahiri së fundmi ka reaguar lidhur me Ligjin e Pagave, gjegjësisht ka thënë se zhvendosja e debatit për këtë ligj në media pa ndodhur dialogu me partnerët institucionale dhe me Kuvedin e minon procesin që në nisje, përcjell InLajmi.
Në veçanti, tha Tahiri se akomodimi i nivelit politik dhe problemet tek shtojca e arsimit, shëndetësisë dhe policisë duhet pasur kujdes dhe reflektuar seriozisht.
Ndryshe, Tahiri propozoi tek përgjegjësit se para se të vie tek finalizimi i këtij ligji duhet konsultuar edhe me opozitën.
Postimi i plotë i tij:
Ligji i Pagave të rregullohet, jo të bie!
Zhvendosja e debatit për Ligjin e Pagave në media pa ndodhur dialogu i mirëfilltë me partnerët institucionalë dhe me Kuvendin e minon procesin që në nisje. Mos reflektimi në aktgjykimin e Gjykatës Kushtetuese për Institucionet e Pavarura Kushtetuese, është tendencë e qartë për ta dështuar ligjin. Madje, edhe vetë shtojca 8, paga e drejtuesit të lartë në ministri, është më e madhe se në Agjencitë e Pavarura Rregulluese.
Ky proces, pa parime të qarta, se cila është baza e nisjes llogaritëse (vlera e koeficientit). Rritja e hendekut të pagave nga 1 me 10 në 1 me 20; më tepër synon akomodimin e diskriminimit, sesa parimit paga e njëjtë për punën e njëjtë. Vendosja e koeficientit asokohe 239, ka qenë niveli bazë i pagës minimale brenda administratës shtetërore.
Në veçanti, akomodimi i nivelit politik dhe problemet tek shtojca e arsimit, shëndetësisë dhe policisë duhet pasur kujdes dhe reflektuar seriozisht. Është e rëndësishme që parashikueshmëria e pagës, të mos rrezikohet në procesin e amandamentimit, çështje që asokohe është hequr gjatë dy leximeve, përkundër insistimit tim dhe qeverisë.
Duke qenë se ky proces konsolidon themelet e pagesës për administratën shtetërore, por edhe mishërimit me këtë çështje, kemi gjithë përkushtimin për të kontribuar që ky ligj të dalë në dritë.
Si kontribut të parë dhe rekomandime, vlerësoj të domosdoshme:
Të rritet vlera e koeficientit;
Procesi të komunikohet qartë që të mos krijohen paqartësi dhe rritje të hendekut me përfaqësuesit sindikalë;
Palët të nisin dialogun serioz mbi parimet e qarta që rregullojnë procesin;
Problemet e identifikuara nga aktgjykimi i Gjykatës Kushtetuese të reflektohen në tërësi;
Të reflektohen pikëpamjet e shoqërisë civile dhe partnerëve ndërkombëtarë: BE, SIGMA, Banka Botërore dhe profesionistëve të çmueshëm në administratë;
Të diskutohet me opozitën për t’i informuar mbi procesin dhe zgjerimin e konsensusit mbi një proces vital sikurse ky i Ligjit të Pagave./InLajmi/
