Kreu i AKR-së, Behgjet Pacolli ka uruar 14-vjetorin e pavarësisë së Kosovës, përcjell InLajmi.
Pacolli tha se rrugëtimi i Kosovës drejt pavarësisë nuk ka qenë i lehtë dhe vazhdon të mos jetë, por që thekson se duhet të punojmë të gjithë së bashku për të përmirësuar gjendjen në vendin tonë, në mënyrë që t’ua rikthejmë shpresën qytetarëve të Kosovës, që të mos synojnë largimin nga vendi.
Tutje Pacolli tha se kjo ka qenë edhe ëndrra e heronjëve tanë, të cilën dhanë jetën për Kosovën.
Kreu i AKR-së theksoi se nga të gjitha dokumentet që ka firmosur në jetë, “Deklarata e Pavarësisë” vazhdon të jetë momenti më i bukur i jetës së tij.
Postimi i plotë i tij:
Nga zemra uroj të gjithë shqiptarët, kudo, me rastin e përvjetorit të pavarësisë së Kosovës. Nesër po bëhen 14 vjet kur ne shpallëm pavarësinë, të cilën e kishim ëndërruar kaq gjatë. Rrugëtimi nuk ishte i lehtë dhe vazhdon të mos jetë, por duhet të punojmë të gjithë së bashku për të forcuar vendin tonë dhe për të përmirësuar mirëqenien e qytetarëve. Duke u dhënë motiv dhe vullnet të qëndrojnë në vend, dhe jo të ëndërrojnë largimin. Kjo ishte edhe ëndrra e heronjve tanë, të cilët dhanë edhe jetën për Kosovë, e të cilët ne sot dhe përgjithmonë duhet t’i kujtojmë! Nga të gjitha dokumentet që kam firmosur në jetë, Deklarata e Pavarësisë vazhdon të jetë më e bukura e jetës sime. Urime gjithëve kjo ditë e madhe! /InLajmi/
