Presidentja e vendit, Vjosa Osmani, e ka falënderuar presidentin e Gjermanisë Frank-Walter Steinmeier, për urimin e tij në nder të 14 vjetorit të pavarësisë së Kosovës, përcjell InLajmi.
Presidenti gjerman, në letrën e tij ka thënë se e mban mend mirë 17 shkurtin e vitit 2008, duke marrë parasysh se në atë kohë ai ishte ministër i Punëve të Jashtme të Gjermanisë, dhe ishte deklaruar pro njohjes së Kosovës.
Tutje Osmani ka thënë se vizita e saj në Gjermani u bë me ftesën e tij i cili u zotua për përkrahje të palëkundur ndaj Kosovës.
Postimi i plotë i saj:
E falënderoj Presidentin e Gjermanisë, Frank-Walter Steinmeier, për urimin e përzemërt për shtetin tonë, në prag të festës së pavarësisë. Ai thekson se e mban mend mirë 17 shkurtin 2008, meqë atëherë ishte ministër i punëve të Jashtme të Gjermanisë dhe menjëherë ishte deklaruar pro njohjes së Kosovës. Për më tepër, ai i jep mbështetje të fuqishme institucioneve të Kosovës në agjendën e reformave dhe në luftën kundër krimit e korrupsionit, si një faktor qendror për zhvillim ekonomik dhe investime të reja.
Gjatë takimit tonë të fundit, kur me ftesë të tij e vizitova Gjermaninë zyrtarisht, Presidenti Steinmeier ritheksoi përkrahjen e palëkundur të shtetit të tij si dhe përkrahjen e tij personale për rrugën e Kosovës drejt arritjes së konsolidimit të plotë në arenën ndërkombëtare.
Kosova është me fat që përgjatë rrugëtimit të saj sfidues ka pranë shtete si Gjermania dhe miq si Presidenti Steinmeier./InLajmi/
