Kryetari i PSD-së, Dardan Molliqaj ka folur pas lirimit të tij nga Policia e Kosovës, gjegjësisht pas mbajtjes për 48 orë në lidhje me protestat në zyret e ZRRE-së , për të publikuar vendimin për shtrenjtim të energjisë elektrike, përcjell InLajmi.
Molliqaj ka thënë se kjo protestë ishte paqësore që për synim kishte sipas tij zbardhjen e mashtrimit të rritjes së çmimit të energjisë elektrike, që shteti përdori policinë.
Ai ka thënë se pyetjeve të tyre për çmimin e energjisë, shteti iu përgjigj me dhunë, teksa ka shtuar se vendimeve të padrejta Qeveria Kurti po u përgjigjet me pushtet, dhunë e disiplinë.
Tutje ai ka bërë të ditur se aktivistët e PSD-së janë liruar në përjashtim të Nol Nushit dhe Genc Sherifit që sipas tij po mbahen nën arrest pa kuptim ligjor.
Postimi i plotë i tij:
PËRBALLË SKANDALEVE E VENDIMEVE TË PADREJTA, PUSHTETI DON DISIPLINË
Ndaj një proteste paqësore që synim kishte zbardhjen e mashtrimit për rritjen e çmimit të energjisë, pushteti përdori policinë.
Ndaj protestuesve që u nxorrën me dhunë, pushteti urdhëroi mbajtje 48 orëshe pa ekzistuar asnjë rrethanë ligjore për një vendim të tillë.
Pyetjeve tona se sa është rritur çmimi i rrymës e sa fiton KEDS-i në krejt këtë krizë, pushteti iu përgjigj me dhunë e diciplinë.
Vendimeve të padrejta dhe thellimit të pabarazisë, Qeveria Kurti po i përgjigjet në mënyrën më tipike për pushtetet me mendësi autoritare: dhunë e disiplinim.
Pas 48 orësh izolim, u liruam të gjithë. Pa ndërruar asnjë rrethanë. Ndërkohë që prokuroria po mban ende nën arrest Nol Nushin dhe Genc Sherifin, në një farsë gjyqësore pa asnjë kuptim ligjor./InLajmi/
