Rrahman Jasharaj nga Sindikata e Bashkuar e Arsimit, Shkencës dhe Kulturës së Kosovës (SBASHK) ka komentuar versionin e ri të Ligjit të Pagave, ndërsa ka paralajmëruar se nëse nuk ftohen në takim nga krerët e shtetit, jo veç si vëzhgues por si palë ku do të jepnin argumentet e tyre për sektorin e arsimit, atëherë do të ndërmarrin masa radikale të ashpra, shkruan InLajmi.
Jasharaj në një prononcim për Gazetën InLajmi ka njoftuar se së fundmi, nga SBASHK-u kanë pasur një takim me përgjegjës nga një komision i krijuar nga ministri i Punëve të Brendshme, Xhelal Sveçla por thotë se aty kanë qenë vetëm si vëzhgues.
“Që nga dhjetori nuk kemi pasur ndonjë takim me përgjegjësit e shtetit, por ministri Sveçla e ka ngritur një komision për Ligjin e Pagave ku ky komision ka pasur një takim me përfaqësues të sindikatave por nga raportimi i përfaqësuesve tanë kam kuptuar se aty janë ftuar veç sa për sy e faqe. Aty përfaqësuesit tanë kanë qenë si vëzhgues pa pasur mundësi të diskutojnë, tregojnë argumentet”,thotë Jasharaj.
Nga mungesa e dialogut, sipas tij po krijohen edhe mundësi për dezinformata.
“Fatkeqësisht dialogu po mungon e kjo nganjëherë po shkakton huti se mund të ketë pastaj arsye edhe për dezinformata. Ministri Sveçla këto ditë tha se nuk është version përfundimtarë por finalizimi nuk është mirë të ndodh pa praninë e sindikatave pa i shikuar propozimet tona”,theksoi Jasharaj për Gazetën InLajmi.
E versioni i Ligjit të Pagave i cili po qarkullon së fundmi në media, Jasharaj thotë se uron të mos jetë përfundimtarë.
“Do të kërkojmë një takim me përgjegjësit për këtë Ligj, në mënyrë që t’i ofrojmë argumentet tona. Nëse vazhdon të bëhet një Ligj degradues dhe pas raportimit që do t’i bëjmë Kongresit tonë i cili do të mbahet në muajin prill do të merren veprime sindikale, siç i kemi pasur më herët, pezullim i mësimit për 3 javë. Po e ritheksoj se nuk kemi pasur mundësi të japim propozimet deri më tash, por i kemi dhënë në media”,tha për fund Jasharaj./InLajmi/
