Analisti politik, Milazim Krasniqi ka lavdëruar mënyrën e mbrojtjes së ndërhyrjes së NATO-s në Kosovë në vitin 1999 nga kancelari i Gjermanisë, Olaf Scholz, gjatë konferencës së përbashkët për media që pati me presidentin rus, Vladimir Putin.
Derisa Putin kritikonte ndërhyrjen e NATO-s në Beograd, Scholz i tha se këtë e bënë me synimin për të parandaluar gjenocidin.
Kjo deklaratë e tij është shpresëdhënëse se politika gjermane ndaj Kosovës do të ndryshojë për mirë, sipas Krasniqit, i cili tha se udhëheqësja paraardhëse e Scholzit, Angela Merkel, nuk kishte interes aspak për Kosovën.
“Është pritur që të ketë ndryshim të politikës gjermane, sepse kancelarja Merkel ka shikuar vetëm interesat strategjike ekonomike gjermane dhe në këtë drejtim Rusia është partneri kryesor, sepse varësia e Gjermanisë nga gazi rus është shumë e madhe. Zonja Merkel mbetet një histori e hidhur për Kosovën edhe pse ka qenë e suksesshme për Evropën, por për Kosovën ka qenë shumë e keqe. Shpresoj shumë që kancelari i ri do të ketë një qasje edhe më konstruktive edhe në raport me Kosovën edhe me Ballkanin. Sado që pati hezitime në fillim qeveria e re gjermane, në fakt me vizitën e tashme në Kiev dhe Moskë dëshmoi lidership dhe veçmas ajo mënyrë korrekte e mbrojtjes së arsyes së intervenimeve në Kosovë tregon që ai e ka kaluar betejën, atë periudhën transitore të lidershipit dhe është bashkuar me të gjithë liderët e Perëndimit”, ka thënë Krasniqi në Edicionin Special në Klan Kosova.
Krasniqi shtoi se Rusia në vazhdimësi tenton që të parandalojë eurointegrimin e Ballkanit dhe se këtë e bën në secilin shtet, por se Kosova, meqë s’është anëtare e OKB-së është një kartë që e përdor shpesh.
