Instituti Demokraci për Zhvillim, këtë të martë ka publikuar raportin “Monitorimi i deklaratës së mirësjelljes në media sociale gjatë zgjedhjeve lokale 2021”, ku përmes këtij raporti është raportuar lidhur me shkeljet që janë bërë në rrjetet sociale nga partitë politike në vend, raporton InLajmi.
Sipas këtij raporti Lëvizja Vetëvendosje është partia me më së shumti shkelje gjatë zgjedhjeve lokale të vitit të kaluar, ndërsa Aleanca për Ardhmërinë e Kosovës me 27% e pasuar nga PDK me 17% .
Drejtoresha Ekzekutive e Institutit Demokracia për Zhvillim (D4D), Rrezarta Krasniqi, tha se Lëvizja Vetëvendosje me 67 % është partia më e shenjëstruar sa i përket shkeljeve.
“Në raundin e parë dhe të 2-të kemi angazhuar 18 monitorues. Kemi arritur që t’i analizojmë mbi 6.000 artikuj. Sa i përket partive politike VV me 67% është partia më e shenjëstruar, AAK me 27%, LDK me 11% ndërsa PDK me vetëm 6%. Është përqindja më e lartë e shprehjes së urrejtjes së grave kandidate. Kemi hasur në tituj të ekzagjeruar në shtrembërim të deklaratave. Përdorimi i rrjeteve sociale gjatë fushatës ka qenë shumë i madh”,tha Krasniqi.
E Allen Meta nga Instituti Demokraci për Zhvillim tha se shkeljet më së shumti janë bërë në rrjetin Facebook.
“Edhe në këto shkelje prin Vetëvendosje. Ky pilot projekt në bazë të dhënave ka treguar një sukses i cili është prej të parëve në këtë fushë. D4D do të vazhdojmë të tentojmë që ta ulim diskursin toksik që ka filluar të rritet. KQZ mund të jenë kontributdhënës për këtë diskurs. Bashkërisht kemi vendosur që është në të mirën e qytetarëve të fillohet një projekt i tillë dhe kemi vendosur që të përpilojmë një kod të mirësjelljes”,tha Meta.
Ndërkaq, sipas tij një organizim tjetër është bërë nënshkrimi i deklaratave të mirësjelljes.
“Është nevojitur trajnim për këtë projekt. Ne kemi angazhuar monitorues për këtë proces”,tha ai./InLajmi/
