Ish-kryeministri i Kosovës, Avdullah Hoti, ka komentuar draftligjin e pagave në sektorin publik, ku tha se ky draftligj përbën anomalinë më të madhe në reformën e sektorin publik, përcjell InLajmi.
Ai ka sqaruar disa nga këto anomali, duke theksuar se qasja në përcaktimin e koeficientëve e shkel parimin bazë të përcaktimit të pagave.
Po ashtu , Hoti tha se parimet e tjera të hierarkisë sa i përket përgjegjësive shkelen gjithashtu.
Postimi i plotë i tij:
Draftligji i pagave në sektorin publik, i cili po qarkullon në opinion, duket se përbën anomalinë më të madhe në reformën e sektorin publik. Në vijim janë disa nga këto anomali:
-Raporti në mes koeficientit maksimal ndaj atij minimal është 1:10, por shkallshmëria e koeficientëve nëpër sektorë nuk ndjek asnjë parim dhe logjikë.
-Raporti në mes të koeficientit maksimal dhe minimal (pra pagës maksimale dhe minimale) në sektorë të caktuar është si në vijim:
-në institucionet e drejtësisë 1:2.8,
-në polici dhe në FSK 1:7.2,
-në arsim 1:3.6,
– në shëndetësi 1:2.8,
– në shërbimin civil 1:5.
-Shefi i kabinetit të ministrit e ka koeficientin 10.8, ndërsa drejtori i SHSKUK-së 10.6.
-Kadeti policor dhe kadeti i FSK-së e kanë koeficientin 2, që është koeficienti më i ulët në tërë sektorin.
-Pozitat si: roje, kopshtar, shtëpiak, mirëmbajtës, autolarës, rrobalarës dhe pozita të ngjashme në Presidencë, Kryeministri dhe institucione të tjera e kanë koeficientin 3.2, që është për 60% më i lartë se për kadetin policor dhe kadetin e FSK-së.
-Kopshtari, shtëpiaku, mirëmbajtësu, autolarësi, rrobalarësi dhe pozitat e ngjashme në Presidencë e kanë koeficientin 3.2, por të njëjtat në Kryeministri e kanë koeficientin 3.1, në gjykata 3, në ministri 2.94 dhe në komuna 2.
-Në fushën e kulturës, koeficienti më i ulët është 3.6, që është vetëm 12% më i lartë se i kopshtarit në Presidencë.
-Kryetari i Komisionit të Pavarur të Mediave e ka koeficientin më të madh se të Kryetarit të Akademisë së Shkencave dhe Arteve dhe të Komandantit të FSK-së.
-Kryesuesi i Këshillit Gjyqësor dhe Kryesuesi i Këshillit Prokurorial, të cilët janë në krye të institucioneve përkatëse të drejtësisë, nuk e kanë koeficientin më të lartë brenda atyre institucioneve.
Kjo qasje në përcaktimin e koeficientëve e shkel parimin bazë të përcaktimit të pagave, që është pagë e njëjtë për punë të njëjtë. Parimet e tjera të hierarkisë sa i përket përgjegjësive shkelen gjithashtu./InLajmi/
