Vietnami do të heqë kufizimet e tij lidhur me COVID-19 në fluturimet ndërkombëtare të pasagjerëve me të gjitha tregjet duke filluar nga 15 shkurti, pa asnjë kufizim në numrin e fluturimeve.
Vendi i Azisë Juglindore vendosi kontrolle të rrepta kufitare në fillim të pandemisë për të mbajtur jashtë COVID-19, me njëfarë suksesi fillestar, por kjo i dha një goditje sektorit të tij të turizmit në zhvillim, i cili përbën rreth 10% të produktit të brendshëm bruto.
“Vietnam do të heqë kufizimet në fluturimet ndërkombëtare duke filluar nga 15 shkurti. Frekuenca e fluturimeve do të rikthehet në nivelin para pandemisë,” ka thënë Dinh Viet Son, zëvendësdrejtor i Administratës së Aviacionit Civil të Vietnamit.
Vietnami i ka informuar tashmë partnerët e tij për politikën e re dhe vetëm Kina nuk ka pranuar ende të rifillojë fluturimet komerciale me Vietnamin, raporton gazeta shtetërore Tuoi Tre.
Ky shtet tashmë kishte filluar gradualisht të rihapte fluturimet ndërkombëtare me 15 tregje nga fillimi i këtij viti duke lehtësuar kërkesat për karantinë, me pasagjerët e vaksinuar që tani u duhen vetëm 3 ditë izolim, transmeton Radio Evropa e Lirë.
Vendi i Azisë Juglindore ka regjistruar afro 2.5 milionë raste me COVID-19 që nga fillimi i pandemisë dhe rreth 39.000 vdekje. Gati 98% e popullatës prej 98 milionë kanë marrë të paktën 2 doza vaksinash, treguan të dhënat zyrtare.
