Të shtunën Presidenti i SHBA Joe Biden i tha Vladimir Putinit të Rusisë se Perëndimi do t’i përgjigjet me vendosmëri çdo sulmi ndaj Ukrainës, duke shtuar se një hap i tillë do të prodhonte vuajtje të gjerë dhe do të izolonte Moskën.
Në përpjekjen e fundit për të menaxhuar armiqësinë në rritje, të 2 liderët folën me telefon për një orë, pasi Uashingtoni dhe aleatët e tij paralajmëruan se ushtria ruse, e cila ka 100.000 trupa të grumbulluara pranë Ukrainës, mund ta pushtonte fqinjen e saj në çdo moment. Moska i ka hedhur poshtë këto paralajmërime.
Një zyrtar i lartë i administratës Biden tha se thirrja ishte profesionale dhe thelbësore, por se nuk kishte asnjë ndryshim thelbësor.
Nga ana tjetër Kremlini tha se Putin i komunikoi Bidenit se Uashingtoni nuk ka marrë parasysh shqetësimet kryesore të Rusisë dhe se nuk kishte marrë asnjë përgjigje për zgjerimin e NATO-s dhe vendosjen e forcave sulmuese në Ukrainë, transmeton euronews.al.
Izraeli, Portugalia dhe Belgjika iu bashkuan listës së vendeve që u kanë kërkuar qytetarëve të tyre të largohen menjëherë nga Ukraina. Departamenti Amerikan i Shtetit urdhëroi shumicën e stafit të ambasadës të largohej nga Ukraina. Pentagoni tha se po tërhiqte rreth 150 trajnerë ushtarakë.
