Partitë opozitare në Kuvend, NISMA Socialdemokrate, AAK-ja dhe PSD e cila është jashtë jashtë saj, pas një takimi që kanë pasur së bashku këtë të premte janë shprehur të gatshëm që në çdo mënyrë ta kundërshtojnë shtrenjtimin e energjisë elektrike nga Zyra e Rregullatorit të Energjisë (ZRRE), raporton InLajmi.
Në takimin që ka pasur partitë opozitare dhe shoqëria civile, njëzëri janë shprehur të gatshëm të protestojnë për vendimin e ZREE-së.
Endrit Shala nga Nisma Socialdemokrate, tha se në takimin që kanë pasur së bashku me krerët opozitarë ndër të tjera është diskutuar edhe për vendimin për të protestuar lidhur me shtrenjtimin e rrymës.
“Ne cilësinë e përfaqësuesit të NISMA-s isha i pranishëm në këtë takim, ku si qëllim ishte mënyra për bashkëveprimin për vendimin që kjo qeveri e ka marr për shtrenjtimin e rrymës e që kjo çështje e ka prek qytetarin e Kosovës. Kemi biseduar për tema të ndryshme por edhe të një proteste të përbashkët”,tha Shala.
Nënkryetari i AAK-së, Ahmet Isufi, tha se do t’i shtjerrin të gjitha mundësitë deri te gjetja e një zgjidhje sa i përket shtrenjtimit të energjisë elektrike.
“Do ti përdorim të gjithë instrumentet demokratike në mënyrë që ta ndalim këtë rritje që e ka bërë Qeveria në bashkëpunim me ZRRE-në”,u shpreh ai.
Në anën tjetër kryetari i PSD-së Dardan Molliqaj tha se ka diskutuar edhe me 2 partitë e tjera opozitare, PDK e LDK më herët për një kundërshtim të përbashkët.
Se kur do të mbahet kjo protestë e përbashkët e partive opozitare, Molliqaj tha se opinioni do të njoftohet me kohë.
“Mund të konfirmoj se ajo kauzë e përbashkët është për të gjithë të pranishmit. Njëzëri jemi pajtuar që të kemi dakordim të gjithë një zëri për kundërshtimin e rritjes së energjisë elektrike. Ky vendim nuk është bërë publik. Neve na u është rritur çmimi i energjisë elektrike me 3 rreshta. I ftojmë edhe partitë e tjera opozitare për dërgimin e shkresave në Gjykatë Kushtetuese. I kemi 2 ditë kohë për modalitetin kohën dhe datën e saktë të protestës”,u shpreh ai./InLajmi/
