Një studim i ri mbi koronavirusin ka dalë në një përfundim shqetësues. Edhe pse mund ta kenë kaluar sëmundjen, një pjesë e njerëzve të prekur prej saj rrezikojnë të mbeten me probleme në zemër.
Madje më i madh, rrisku duket se paraqitet tek ata që kanë pasur simptoma të buta dhe nuk kanë përfunduar në spital prej Covid 19-tës.
“Ky virus, vërtet që duket se nuk kursen njeri”,tha Ziyad Al-Aly i Universitetit të Washingtonit.
“Njerëzit e prekur nga koronavirusi duhet t`ia vënë veshin shëndetit e të kërkojnë ndihmë mjekësore nëse kanë dhimbje gjoksi, nëse ndiejnë një lloj peshe në gjoks, kanë rrahje të shpeshta zemre, ënjtje të këmbëve e të tjera”,shtoi ai.
Studimi i ri amerikan vjen në një kohë kur administrata e Joe Biden gjendet nën trysninë për të lehtësuar kufizimet e lidhura me pandeminë. Shtetet që e kanë humbur durimin, mes tyre Nju Jorku që drejtohet nga një guvernatore demokrate, e kanë bërë të qartë se nuk do të presin Uashingtonin ndërsa irritimi publik po rritet, shkruan Reuters
Në fillim të kësaj jave, Nju Xhjersi, Konektikati dhe Dellaueri bënë publike plane për t’iu bashkuar atyre shteteve që kanë hequr ose nuk kanë pasur kurrë urdhra në fuqi, për mbajtjen e maskave në shkolla. Shteti i Masaçusetsit do të ndjekë shembullin në fund të këtij muaji. Të gjitha këto shtete, përveç Masacusetsit, drejtohen nga guvernatorë demokratë, transmeton Top Chanel.
Më shumë se 2.000 njerëz po humbin jetën çdo ditë në vend si pasojë e COVID-it dhe brenda administratës ka zëra kundër heqjes dorë nga kufizimet pavarësisht se numri i vdekjeve vazhdon të jetë i lartë.
