Kreu i PSD-së, Dardan Molliqaj, ka kërkuar shkarkimin e Zotriut të Parë, Prindon Sadriut, pas deklaratave të tij ndaj gazetarëve i cili i quajti “ndërmarrje të përbashkëta kriminale”, përcjell InLajmi.
Molliqaj ka thënë se deklarata e tij është e një njeriu që është i veshur me pushtet, ndërsa ritheksoi se pikërisht ky pushtet ka bërë që institucionet përgjegjëse të heshtin sikur asgjë nuk ka ndodhur.
Ai ka thënë se pas këtyre deklaratave, Sadriut duhet t’i niset procedurë gjyqësore e që askush nuk e ka bërë deri tash.
Postimi i plotë i tij:
Prindon Sadriu duhet të shkarkohet
Duke qenë diplomat i shtetit dhe bashkëshort i presidentes, Prindon Sadriu ka linçuar e kërcënuar media e gazetarë. Deklarata e tij është deklaratë e njeriut të veshur me pushtet. Në anën tjetër, sjellja e institucioneve përgjegjëse sikur asgjë nuk ka ndodhur e vërteton çasjen që e ka pushteti ndaj fjalës së lirë.
Pra, nuk bëhet fjalë për kufijtë etikë që nuk duhet kaluar. Thjesht, ka rëndësi kujt i drejtohet kritika. Një polic ka kërkuar më shumë të drejta brenda kontekstit kur po diskutoheshin shtesat e privilegjet e deputetëve. Menjëherë i mori 6 muaj suspendim. Prindonit diplomat, pjesë e pushtetit presidencial nuk i nisë procedurë kush. Pushteti do disiplinë!/InLajmi/