Me rastin e hapjes së pikës së re të vaksinimit në sheshin “Zahir Pajaziti” në Prishtinë, ministri i Shëndetësisë, Rifat Latifi, e ka cilësuar si ngjarje me rëndësi, derisa ka bërë thirrje tek të gjithë qytetarët që nuk janë vaksinuar të vaksinohen, raporton InLajmi.
“Kjo është një ngjarje me rëndësi. Vetëm në këtë mënyrë, nuk do të kemi raste ose të prekur me koronavirus, pra nëse bëhet vaksinimi. Lus të gjithë qytetarët që nuk janë vaksinuar, të vaksinohen me krejt dozat, ata që duan. Vetëm në këtë mënyrë e mbajmë hapur qytetin e bukur të Prishtinës, i mbajmë hapur restorantet, të gjitha lokalet, jetën tonë e mbajmë hapur, shkollat”,tha minsitri Latifi.
Në anën tjetër nëse nuk vaksinohemi, Latifi tha se kjo ditë e bukur që po mbretëron mund të përkeqësohet.
“Nëse nuk vaksinohemi kjo ditë kaq e bukur mund të na përkeqësohet. Unë nuk dua ta mbaj asnjë restaurant e palestër mbyllë, por t’i lëmë të punojnë si zakonisht”, theksoi ai.
Ndërsa, risi sipas tij do të jetë se shumë shpejtë do të hapet edhe një pikë tjetër, kësaj radhe në lagjen “Kodra e Trimave” në Prishtinë.
“Në Kodrën e Trimave shumë shpejt do ta hapim një pikë të vaksinimit, e po ashtu edhe në komuna tjera. Krejt kjo në mënyrë që vaksina të shkojë te qytetarët”,tha për fund Latifi./InLajmi/
