Kreu i PDK-së, Memli Krasniqi po qëndron në Tiranë, ndërsa së fundmi ka zhvilluar takim me kryetarin e Grupit Parlamentar të Partisë Socialiste, Taulant Balla, me të cilin diskutuan për përgjegjësitë e tyre si politikanë, përcjell InLajmi.
Krasniqi ka thënë se Shqipëria ka përvoja të mëdha , ndërsa Kosova është ajo që ka çfarë të përfitojë nga këto përvoja.
Krasniqi ka folur po ashtu edhe për raportet me institucionet e Shqipërisë, duke theksuar se këto raporte do të avancohen dhe më shumë.
Postimi i plotë i tij:
Gjatë vizitës zyrtare në Shqipëri, bashkë me Kryetarin e Grupit Parlamentar të PDK-së, Abelard Tahiri, nënkryetarët e partisë Vlora Çitaku e Uran Ismaili dhe sekretarin e përgjithshëm Bajrush Xhemaili, sot takova edhe udhëheqësin e shumicës parlamentare ne Shqipëri, Kryetarin e Grupit Parlamentar të Partisë Socialiste, Taulant Balla.
Në frymën e një bashkëpunimi shumë të mirë, me Taulantin diskutuam për përgjegjësitë tona si politikanë, si Parti Politike dhe si Grupe Parlamentare, që të angazhohemi edhe më tej në përafrimin dhe koordinimin e agjendës shtetërore të 2 vendeve tona.
Shqipëria ka bërë një punë të madhe në avancimin e legjislacionit dhe stabilitetit institucional gjatë kësaj periudhe, andaj Kosova ka çka të përfitojë nga përvoja e Shqipërisë.
Raportin dhe koordinimin e shkëlqyeshëm që kemi pasur me institucionet e Shqipërisë, jemi shumë të përkushtuar dhe të vendosur që ta avancojmë në nivele akoma më të larta./InLajmi/
