Ministrja e Drejtësisë, Albulena Haxhiu, ka kujtuar 2 heronjtë, Arben Xheladinin dhe Mon Balajn në 15 vjetorin e vrasjes së tyre, përcjell InLajmi.
Haxhiu ka thënë se vrasja e tyre ishte një ndër shkeljet më të rënda ndaj të drejtave të njeriut që ka ndodhur ndonjëherë e që sot e asaj dite nuk është ndëshkuar ende askush.
Tutje Haxhiu tha se kjo vrasje duhet të mbetet në kujtesë që të luftojmë të gjithë për të drejtat që iu mohuan këtyre 2 të rinjve që u iu mor jeta para kohe.
Postimi i plotë i saj:
Sot janë bërë 15 vite nga vrasja e Mon Balajt dhe Arben Xheladinit, 2 qytetarëve të Kosovës të cilët i ishin bashkuar demonstratës së organizuar nga Lëvizja VETËVENDOSJE!, për vetëvendosje dhe kundër pakos së Ahtisarit.
Moni dhe Arbeni ishin në mesin e mijëra qytetarëve të cilët përmes pjesëmarrjes në demonstratën e 10 shkurtit shprehën pakënaqëitë e tyre kundrejt padrejtësive që i bëheshin vendit.
Vrasja e Arbenit dhe Monit ishte një ndër shkeljet më të rënda të të drejtave të njeriut në Kosovën e pasluftës, një shkelje e kryer nga forcat e një pushteti të huaj, para syve të gjithë botës. Ishte një shkelje flagrante që deri më sot, mbetet e pandëshkuar por njëkohësisht e paharruar.
Le ta kujtojmë sot dhe përherë Arbenin dhe Monin, 2 djem të rinjë qe na u morën para kohe.
Le të shërbejë kjo padrejtësi e paharrueshme, kjo plagë e pashëruar, si një shtysë për ne që të luftojmë gjithnjë e më fort për ato ideale për të cilat Arbeni dhe Moni kanë humbur jetën e tyre, si dhe që të avokojmë gjithnjë e më zëshëm për ato të drejta të cilat, edhe pas vdekjes, iu janë mohuar padrejtësisht.
Lavdi jetës dhe veprës së Monit dhe Arbenit!/InLajmi/
