Analistja politike, Alisa Braho, vlerëson se Qeveria Kurti ka improvizuar deri tani.
“Ka qenë pak improvizim e gjithë Qeveria Kurti deri tani, nuk kemi të bëjmë me një qeveri të majtë. Ra halli i vaksinave improvizuan diçka, ra halli i energjisë elektrike prapë improvizuan diçka”.
Braho, në “Rubikon”, tha se qeveritë e kaluara janë përballur me probleme më të mëdha se Qeveria Kurti, teksa thekson se sa më të mëdha të jenë premtimet aq më i madh do të jetë zhgënjimi.
“Po mbase nuk kanë qenë më herët në pushtet dhe nuk kanë përvojë. Ka pasur qeveri të mëparshme që u është dashur të merren me probleme edhe më problematike sesa këto që po merren Qeveria Kurti. Kur ndodhësh i papërgatitur nuk mund t’i fajësosh qytetarët njësoj siç vepruan me qytetarët kur u shtrenjtua energjia elektrike. Qeverisë nuk i uroj të keqën përkundrazi pritshmëritë e mija ishin shumë më të mëdha duke pasur parasysh se si erdhën në qeveri”.
“Nuk më bën përshtypje që kanë marrë të gjitha bordet, se këtë e kanë bërë të gjitha qeveritë kjo është një gjë “shqiptare” që e bëjnë të gjithë. Sa më të mëdha premtimet aq më i madh është zhgënjimi”, tha Braho, njofton Klan Kosova.
Mes tjerash, Braho, teksa flitet për luftimin e korrupsionit thotë se qeveria nuk bën hetime dhe është e kotë të thuhet se u luftua korrupsioni, për aq kohë sa nuk u kap asnjë “kokë e madhe”.
