2 aktivistët e Lëvizjes Vetëvendosje, Arben Xheladini dhe Mon Balaj, derisa protestonin kundër negociatave të Kosovës me Serbinë dhe Pakos së Ahtisaarit, u vranë më 10 shkurt nga policia rumune e UNMIK-ut, 15 vjet më parë, përcjell InLajmi.
Xhelal Sveçla, ministri i Ministrisë së Punëve të Brendshme, ka kujtuar këtë të enjte, në përvjetorin e 15-të, Arben Xheladinin dhe Mon Balaj, të cilët u vranë nga policia e UNMIK-ut.
Sveçla tha se sot i kujton Monin e Arbenin, si dëshmorë të popullit për liri e vetëvendosje.
Tutje tha ai, 2 aktivistët e ndjerë e dhanë jetën për Kosovën dhe sakrifica e tyre për liri e pavarësi është udhërrëfyesi më i qartë në përgjegjësitë që kanë karshi tyre dhe gjithë qytetarëve të Republikës së Kosovës.
Postimi i plotë i tij:
Sot bëhen 15 vite prej protestës së 10 shkurtit 2007. U organizuam për të protestuar kundër pakos së Ahtisarit, e cila theksonte kufizime kundrejt aspiratave legjitime të popullit të Kosovës. Popullit të Kosovës i takonte pavarësia dhe nuk kishim çfarë të jepnim më shumë se ç’dhamë.
Mijëra protestues paqësorë që kërkonin vetëvendosje u përballën me dhunën e shfrenuar të policisë së UNMIK-ut. Mbi 232 plumba gome me afat të skaduar u hodhën mbi protestues nga të cilët u plagosën dhjetëra qytetarë, ku u vranë Mon Balaj e Arben Xheladini dhe u plagosën rëndë Mustafë Nerjova, Zenel Zeneli e Hysni Hyseni.
Sot kujtojmë Monin e Arbenin, si dëshmorë të popullit për liri e vetëvendosje. Ata dhanë jetën për Kosovën dhe sakrifica e tyre për liri e pavarësi është udhërrëfyesi ynë më i qartë në përgjegjësitë që kemi karshi tyre dhe gjithë qytetarëve të Republikës sonë.
Lavdi jetës dhe veprës së Mon Balajt dhe Arben Xheladinit.
Ne po ecnim drejt atë ditë, ne duhet e do të ecim drejt gjithmonë!/InLajmi/
