Komisioni për Çështje të Sigurisë dhe Mbrojtjes ka shtyrë për në mbledhjen e ardhshme Nismën Legjislative për Komisionerin Parlamentar për FSK-në, me kërkesë të deputetit të Lëvizjes Vetëvendosje, Enver Dugolli, raporton InLajmi.
Më tej Dugolli, ka shpjeguar arsyet e shtyrjes së kësaj mbledhjeje.
“Unë kisha propozuar këtë pikë të rendit ditës ta lëmë për një ditë tjetër. Sot kërkohet vendimmarrje për këtë nismë dhe po kërkoj ta shtyjmë. Nuk janë plotësuar kushtet dhe grupi po kërkon të shtyjë për një mbledhje tjetër. Plani i punës është i mirë por mungon raportimi i ministrit të Mbrojtjes. Kisha propozuar të futet në sesionin pranveror dhe dimëror. Nuk është në plan raportimi i kryeshefit të inspektoratit”,theksoi deputeti Dugolli.
Ndërsa, Anton Quni nga Lidhja Demokratike e Kosovës kërkoi që në takimin e radhës të vijnë me propozime konkrete.
“Ne i kemi ngritur te gjitha dilemat. Jemi të pajtimit që ligjin ta procedojmë. Nëse ka mundësi brenda javës, e shtyjmë për një javë. Është mirë të kemi kohë dhe në takimin e radhës të vijnë propozime konkrete se këtë duhet ta thërrasim”,tha ai.
E deputeti i VV-së, Mefail Bajqinovci, propozoi që në mbledhjen e radhës të vijnë për raportim drejtori i Departamentit të Drogës dhe ai i Trafikut.
Në theks të veçantë ai foli lidhur me ftesën për Drejtorin e Trafikut, për shkak të aksidenteve të shumta që po ndodhin. /InLajmi/
