Shefja e Grupit Parlamentarë të Lëvizjes Vetëvendosje, Mimoza Kusari Lila ka njoftuar së fundmi se kanë proceduar kërkesë zyrtare në Kryesinë e Kuvendit të Kosovës që të autorizohet Komisioni për Buxhet, Punë dhe Transfere që të rishikojnë vendimin për caktimin e lartësisë së shpenzimeve mujore të deputetëve, përcjell InLajmi.
Kusari Lila ka thënë se si grup kanë shprehur gatishmërinë që të punojnë për përmbajtjen e vendimit të ri për shpenzimet.
Tutje, ajo ka ritheksuar faktin se LVV ka hequr dorë ditë më parë nga shpenzimet mujore të caktuara për deputetë sipas rregullores së Kuvendit.
Postimi i plotë i saj, pa ndërhyrje:
Sot Grupi Parlamentar i Lëvizjes VETËVENDOSJE!, ka proceduar kërkesë zyrtare në Kryesinë e Kuvendit të Republikës së Kosovës që të autorizohet Komisioni për Buxhet, Punë dhe Transfere për të rishikuar vendimin për caktimin e lartësisë së kompensimit të deputetit për funksion udhëheqës dhe kompensimin e shpenzimeve mujore.
Poashtu, e ritheksojmë se deputetët e Lëvizjes VETËVENDOSJE!, heqin dorë vullnetarisht nga kompensimi për shpenzimet e udhëtimit, për pjesëmarrje në punimet e seancës plenare dhe në komisione, ndërsa shprehemi të gatshëm të kontribuojmë në përmbajtjen e vendimit të ri për lartësinë e kompenzimit të deputetëve duke ftuar të gjitha palët e interesuara të bëhen pjesë e diskutimit kur të fillojë puna në vendimin e ri./InLajmi/
