Muhamet Hamiti, ish-bashkëpunëtor i presidentit Ibrahim Rugova, ka thënë se ishte pranë tij edhe gjatë kohës kur ishte mbajtur Konferenca e Rambujesë, më 6 shkurt të vitit 1999.
Në Info Magazine të Klan Kosovës, Hamiti ka theksuar se delegacioni i Kosovës në këtë ngjarje historike ishte përpjekur që të arrijë marrëveshje sa më të mirë për Kosovën.
“Kryesues i delegacionit të Kosovës ishte Hashim Thaçi. Aty e ke pasur një delegacion që në pjesën më të madhe ka qenë i përfaqësuar nga komponenta politike, e atyre që janë zgjedhur me votë, por edhe nga komponenta ushtarake, e përfaqësuesve të Ushtrisë Çlirimtare të Kosovës”.
Si ishte interpretuar nga mediet në përgjithësi, a ka qenë ky kompromisi që e ka bërë vetë Rugova për të mos lejuar dështimin e kësaj marrëveshjeje, nëse nuk do të lejohej Hashim Thaçi të ishte kryesues i delegacionit?
“Ai nuk do ta bënte kurrë, por as edhe nuk e ka bërë, as do ta bënte kurrë, sepse ai ka parë më larg, Rugova kishte punuar për gati një dekadë që çështjen e Kosovës ta bënte të njohur në botë. Kishte marrë pjesë në takime të ndryshme ndërkombëtare, por asnjëri prej tyre i nivelit të Rambujesë. Kjo ka qenë për herë të parë konferencë ndërkombëtare për Kosovën, e drejtuar nga Britania e Madhe, Franca si dhe përfaqësues të SHBA-së, Rusisë, BE-së.
“Kjo është konferenca më e lartë e nivelit më të lartë për Kosovën, pas një periudhe 10-vjeçare nën pushtimin serb, solli kohën kur bota qëndroi pranë nesh, pastaj pas një muaj nën drejtimin e SHBA-së, bota intervenoi në atë që e quajti ndërhyrje humanitare për të, i hapi rrugë zgjidhjes politike që Rugova ishte angazhuar për një dekadë”, ka thënë Hamiti.
Ai ka folur edhe për mosdeklarimin e liderëve të shtetit për 23-vjetorin e Konferencës së Rambujesë që ishte dje.
“Unë them se kjo shpërnjohje e kësaj konference të rëndësishme për Kosovë nuk është gjë e mirë për askënd aq më pak për drejtuesit politik të Kosovës”.
