Drejtori i Shëndetësisë në Prishtinë, që është edhe infektolog me profesion, Izet Sadiku, thotë se vaksina nuk ofron mbrojtje 100% kundër koronavirusit.
Sadiku, në RTV Dukagjini, megjithatë thotë se vaksina është mbrojtja më e mirë kundër koronavirusit dhe formave të rënda të sëmundjes.
“Tash kemi rreth 30.000 raste aktive dhe vetëm rreth 100 persona janë të hospitalizuar. Vitin e kaluar ndoshta kemi pasur shumë më pak raste aktive, por kemi pasur mbingarkesë në spitale”, tha ai
Sadiku ka treguar edhe një rast personal për efektin e dozës së 3 të vaksinës.
“Javën e kaluar, kemi pasur 2 fëmijët pozitivë me koronavirus. Bashkë me bashkëshorten, e kemi ditur që ata janë pozitivë por nuk është se jemi ruajtur nga ta. Për shkak se kemi pasur edhe dozën e 3 të vaksinës, ne nuk jemi infektuar. Kjo tregon efektshmërinë e vaksinës”, tha ai
Ai thotë se në Kosovë pak njerëz ka të imunizuar me dozën e 3.
“Vetëm ata që kanë marrë dozën e 3 në dhjetor konsiderohen të imunizuar, pasi që ata që janë vaksinuar në janar e këndej ende mund të mos kenë fituar imunitet. Mirëpo, edhe ata që marrin dozën e 3 të vaksinës nuk kanë mbrojtje 100% ndaj Omicronit. Nëse 100 persona marrin dozën e 3, gjasat janë që 25 të infektohen, por ata do ta kalojnë shumë lehtë sëmundjen”, theksoi Sadiku.
