Ekspertja ligjore për media, Flutura Kusari, ka reaguar në lidhje me arrestimin e kameramanit kosovar, Albion Selitaj nga Policia e Kosovës, përcjell InLajmi.
Kusari e ka quajtur të papranueshëm arrestimin e kameramanit Selitaj, duke thënë se ai ishte duke vepruar me etikën e mediave.
Tutje ajo ka thënë se ky është një turp për Policinë e Kosovës dhe se drejtori i policisë duhet të japë llogari në detaje lidhur me këtë çështje.
Postimi i plotë i saj:
Absolutisht i papranueshëm arrestimi i kameramanit të Ekonomia Online Albion Selitaj në operacionin e policisë.
Qysh arrestohet kameramani more? Qysh kështu? A e dini në cilat shtete arrestohen kameramanët?
E pashë videon, djali ke tu vepru në pajtim të plotë me etikën e mediave.
Një grup i madh i policëve me forcë e larguan nga vendi i ngjarjes, sikur ai të ishte ndonjë mafioz me rrezikshmëri të lartë. Policët s’guxojnë me gisht me i prek gazetarët dhe kameramanët kur janë duke e kryer detyrën.
Turp turp turp për policinë. Drejtori i policisë duhet me japë llogari të detajuar se përse policët e tij i pengojnë mediat. Inspektorati Policor i Kosovës duhet të reagojë urgjentisht ex officio./InLajmi/
