Nxënësja e shkollës fillore “Bashkimi”, në Gositvar, Ëmbla Ademi është kthyer sërish në bankat shkollore, ku prindërit e nxënësve në këtë shkollë, ishin ata që nuk dëshironin që ajo të jetë pjesë e shoqërisë së fëmijëve të tyre për shkak se ishte me Sindromën Down, përcjell InLajmi.
Lajmin për kthimin e saj në shkollë e ka bërë të ditur Ministri i Arsimit në Maqedoninë e Veriut, Jeton Shaqiri, i cili ka thënë se Ëmbla është shumë e gëzuar për faktin se tani do të jetë mes shokëve dhe shoqeve të saj, ku edhe do të marrë njohuri të reja njësoj si të gjithë.
Shaqiri tha se ne duhet të krijojmë kushte për të gjithë fëmijët që të realizojnë ëndrrat e tyre si dhe duhet të punojmë në ndërgjegjësimin ndaj fëmijëve me aftësi të kufizuara.
Ministri Shaqiri i ka dëshiruar suksese Ëmblës, duke i thënë se do i qëndrojë pas çdo ”beteje”.
Postimi i plotë i tij:
Nxënësja e klasës së 4, Ëmbla Ademi nga Gostivari nuk e ka ndjerë gëzimin e kthimit në shkollë në ditën e parë të gjysmëvjetorit të 2-të, sepse, fatkeqësisht në shoqërinë tonë akoma ka stereotipe dhe paragjykime për personat me nevoja të veçanta.
Por, për kënaqësinë time personale dhe akoma më shumë për kënaqësinë e familjarëve të saj dhe mbi të gjitha për kënaqësinë e saj, sot ajo është sërish mes shokëve të klasës dhe jashtëzakonisht e lumtur që vazhdon të marrë njohuri të reja, të përparojë dhe të krijojë miqësi me bashkëmoshatarët e saj.
Lumturia në sytë e Ëmblës është lumturia jonë e përbashkët. Fitore e shoqërisë dhe vlerave të vërteta njerëzore. Uroj që situata të tilla të mos ndodhin më. Prandaj, ne duhet të vazhdojmë të kontribuojmë në ndërgjegjësimin ndaj fëmijëve me aftësi të kufizuara.
Ata nuk janë të ndryshëm nga të tjerët dhe meritojnë qasje të barabartë në arsim cilësor si gjithë të tjerët. Është një e drejtë themelore dhe ne jemi të detyruar ta mundësojmë, të krijojmë kushte në të cilat çdo fëmijë do të zhvillohet dhe realizojë potencialin e tij të plotë.
Të dëshmojmë se ngritja e gjithëpërfshirjes së sistemit arsimor është prioriteti ynë kryesor dhe një proces që ne do të vazhdojmë ta zbatojmë.
E nderuara Ëmbla , të uroj suksese në shkollimin e mëtutjeshëm. Unë qëndroj pas teje në çdo betejë tjetër! /InLajmi/
