Edhe një shtet lajmëron se së shpejti do t’i largojë kufizimet kundër COVID-19
Italia do të njoftojë së shpejti për heqje të kufizimeve për koronavirus, ka thënë të mërkurën kryeministri italian, Mario Draghi, teksa numri i rasteve të infektimit ka nisur të zvogëlohet.
Italia ka regjistruar më shumë se 147.000 viktima me koronavirus dhe 11.23 milionë raste të infektimit prej shpërthimit të pandemisë 2 vjet më parë.
Vendosja e maskës është e detyrueshme në ambientet e jashtme.
“Në javët në vijim ne do të vazhdojmë këtë rrugë të rihapjes. Duke u bazuar në të dhënat shkencore, ne do të njoftojmë për afatet e heqjes së kufizimeve aktuale”, ka thënë Draghi, sipas një deklarate të publikuar nga zyra e tij.
Fushata shtetërore e vaksinimit konsiderohet e suksesshme, pasi më shumë se 80% e njerëzve kanë marrë 2 doza, dhe më shumë se 57% kanë marrë një dozë përforcuese.
Draghi ka thënë se afati i pasaportës së vaksinës – që tregon se dikush është vaksinuar, apo është shëruar nga sëmundja – nuk do të ketë afat për ata që kanë marrë dozën e 3-të.
Pasaporta e vaksinës është e domosdoshme për të marrë pjesë në shumicën e aktiviteteve në këtë shtet, transmeton gazeta Express.
Qeveria ka marrë vendim të mërkurën që të lehtësojë masën e karantinës për nxënësit që janë të vaksinuar.
