Kryetari i Aleancës për Ardhmërinë e Kosovës, Ramush Haradinaj beson se marrëveshja përfundimtare ndërmjet Kosovës dhe Serbisë do të arrihet brenda këtij viti.
Duke folur për takimin e sotëm me të ngarkuarin e BE-së për dialogun Miroslav Lajçak dhe përfaqësuesin e SHBA-së për Ballkanin Perëndimor, Gabriel Escobar dhe ambasadorin amerikan, Jeffrey Hovenier, ish-kryeministri i Kosovës ka thënë se në këtë takim është biseduar për dialogun dhe procesin e mëtutjeshëm.
“Në takimin që e kemi zhvilluar sot me Escobar, ambasadorin Hovenier dhe përfaqësuesin e BE-së, Lajçak u diskutua kryesisht dialogu, çështjet e hapura, temat që na presin lidhur me procesin më tutje. Shfrytëzova po ashtu mundësinë t’i falënderoj për faktin se kemi një vizitë të përbashkët të një të ngarkuari kaq të lartë siç është Escobar dhe atij të BE-së, diçka që ne si Aleancë e kemi kërkuar ndër vite, dhe besoj se ky është një tregues i mirë sepse Amerika është shumë më direkt në temë. Jemi në atë fazën kur duhet ratifikuar cilëndo çështje të hapur të mbetur, të ndërsjellë për t’i përmbledhur ato në një marrëveshje finale, obligative-ligjore, gjithëpërfshirëse për njohje reciproke Kosovë-Serbi me kufijtë ekzistues, në respektim të integritetit territorial dhe të sovranitetit si dhe të rendit kushtetues dhe politik. Tani duhet rënë dakord për të gjitha temat. Tani kërkohet të gjitha çështjet të përmbledhen në një marrëveshje finale dhe jam i bindur se po shkohet drejt fazës së marrëveshjes finale”, ka thënë Haradinaj në RTK.
Ai ka thënë se tani situata është më ndryshe dhe po kërkohet që të përfshihen të gjitha çështjet dhe jo vetëm çështja e asociacionit dhe të shkohet drejt marrëveshjes finale.
“Çështja e Asociacionit është e hapur, por ajo që na gëzon është fakti se bëhet fjalë për respektim të rendit kushtetues, integritetit territorial dhe sovranitetit të vendit. Ajo që është me rëndësi janë qëndrimet zyrtare të Amerikës, e tani së fundmi këto qëndrime ishin mjaft të qarta edhe nga i ngarkuari i BE-së për dialogun, Lajçak, ku tha se marrëveshja përfundimtare synon njohjen reciproke Kosovë – Serbi. Rendi kushtetues dhe politik do të ruhet dhe nuk do të ketë pushtet të tretë. Pra, Kosova tani mundet me një siguri më të madhe të ecë përpara. Kosova s’ka obligim për asociacion jo kushtetues”, ka nënvizuar Haradinaj.
I pyetur nëse është synim dhe e sheh të mundshme arritjen e një marrëveshje brenda këtij viti, Haradinaj është shprehur optimist.
“Është pritje reale, është e mundshme dhe besoj se mund të arrihet këtë vit marrëveshja për njohje reciproke ndërmjet Kosovës dhe Serbisë në kufijtë ekzistues. Mendoj se Perëndimi, në këtë rast sidomos Uashingtoni i ka dhënë mjaft kohë Serbisë për më shumë se dy dekada për këtë. Kosova asnjëherë s’ka qenë pengesë e dialogut. Kosova çdo herë ka qenë e gatshme për marrëveshjen finale. Mendoj se edhe Serbisë mos përmbyllja e kësaj marrëveshje i kushton në perspektivën evropiane dhe sidomos në aspektin ekonomik”, është shprehur Haradinaj.
