25 vite më parë kanë dhënë jetën e tyre për lirinë e Kosovës, 3 heronjtë Zahir Pajaziti, Hakif Zejnullahu dhe Edmond Hoxha, përcjell InLajmi.
I pari i Partisë Demokratike të Kosovës, Memli Krasniqi, së bashku me bashkëpunëtorët e tij sot ka bërë homazhe tek shtatorja e Zahir Pajazitit në Prishtinë, derisa tha se krejt ata që i kanë njohur e dinë se këta heronjë jetonin për ta dhënë jetën për Kosovën.
Zahir Pajaziti, Hakif Zejnullahu e Edmond Hoxha, sipas Krasniqit e ndjenin se do vinte liria përmes guximit dhe sakrificës së tyre.
Postimi i plotë i tij:
25 vjet më parë, me zemrën plot dashuri për Atdheun e me ideal për çlirimin e tij në mendje, Zahir Pajaziti, Hakif Zejnullahu dhe Edmond Hoxha, ndër 3 pushkat e para të lirisë, ranë për t’u lartësuar në përjetësi.
Ata që i kanë njohur këta trima, thonë se jetonin për ta dhënë jetën për Kosovën. Për lirinë që, megjithëse nuk e pritën të gjallë, në mendje dhe shpirt e ndjenin se ajo do të vinte përmes guximit e sakrificës së tyre.
Sot, Zahiri, Hakifi e Edmondi, me mijëra çlirimtarë të tjerë që u flijuan në rrugën e çlirimit, janë bërë dritë mbi ditët e bardha të Kosovës. Lavdi e përjetshme!/InLajmi/
