Ekspertët vlerësojnë se një në 10 persona që infektohen me koronavirus do të vuajnë nga një sërë simptomash pasi sëmundja akute të jetë zhdukur.
Por edhe njerëzit që shërohen shpejt nga ky virus mund të përjetojnë disa efekte anësore të papritura: Hulumtimet e fundit tregojnë se koronavirusi mund të çojë në humbje të përkohshme të flokëve, flokë të thinjura dhe alopeci.
Pse koronavirusi mund të shkaktojë rënie të përkohshme të flokëve?
Sipas Akademisë Amerikane të Dermatologjisë (AAD), humbja e përkohshme e flokëve është e zakonshme pas etheve ose një sëmundjeje.
Në një cikël normal të rritjes së flokëve, është normale të humbasësh 50 deri në 100 qime në ditë. Mund të jetë e vështirë të thuhet nëse po humbni më shumë se normalisht. Por nëse nxirrni grumbuj të mëdhenj në dush, kjo është një shenjë se po përjetoni rënie të tepërt të flokëve.
Një sëmundje si koronavirusi e vë trupin nën stres, gjë që mund të shkaktojë më shumë rënie se zakonisht. Megjithatë, zakonisht duhen rreth 2 deri në 3 muaj pas sëmundjes akute që të ndodhë rënia e tepërt. Kjo është arsyeja pse ata që kaluan sëmundjen mund të mos e kenë kuptuar se rënia e flokëve ishte e lidhur me sëmundjen, transmeton Telegrafi
Nëse besoni se po përjetoni rënie të tepruar të flokëve të shkaktuar nga koronavirusi mund të merrni frymë lehtësuese! Është e përkohshme dhe flokët tuaj do të rriten përsëri. AAD vëren se flokët tuaj duhet të kthehen në trashësinë e tyre normale në 6 deri në 9 muaj.
