Sergio Mattarella, i cili u zgjodh sërish si presidenti i Italisë ka shprehur falënderimet për besimin e dhënë ndaj tij dhe tha se ditët e jashtëzakonshme që po kalojnë kërkojnë që të veprohet me përgjegjësi.
Pas garës presidenciale që zgjati 6 ditë në vend, Mattarellas iu njoftua rezultati i rizgjedhjes në detyrën e presidentit. Presidentja e Senatit, Elisabetta Alberti Casellati dhe presidenti i Dhomës së Përfaqësuesve, Roberto Fico, shkuan në pallatin presidencial Quirinale dhe njoftuan presidentin Mattarella për zgjedhjen e tij për herë të dytë në këtë detyrë.
Në një fjalim këtu presidenti italian Mattarella shprehu falënderimet për besimin e parlamentarëve dhe delegatëve rajonal ndaj tij.
“Këto ditë të vështira që po kalojmë në një situatë emergjente serioze shëndetësore, ekonomike dhe sociale, kërkojnë që të veprohet me ndjenjë përgjegjësie. Këto kushte kërkojnë që personi të mos i shmanget detyrave për të cilat është thirrur dhe duhet të mbizotërojë mbi konsideratat e ndryshme personale”, tha ai.
Sergio Mattarella tha se e pranon me respekt vendimin e Parlamentit dhe shtoi se pas kësaj ka angazhime për të përmbushur pritshmëritë dhe shpresat e popullit.
Presidenti Mattarella, pas betimit më 3 shkurt do të fillojë mandatin e 2-të 7 vjeçar.
Ndërkohë Mattarella për rizgjedhjen e tij është uruar edhe nga presidenti i Këshillit Evropian, Charles Michel, presidentja e Komisionit Evropian, Ursula von Leyen, presidentja e Parlamentit Evropian, Roberta Metsola, lideri shpirtëror i botës katolike dhe kreu i Vatikanit, Papa Françesku.
Sergio Mattarella, u zgjodh për herë të 2-të në detyrën e presidentit duke marrë 759 vota nga 983 delegatë elektoralë në raundin e 8-të të votimit i cili u zhvillua mbrëmë në “Asamblenë e Madhe Zgjedhore” e cila u mblodh për të zgjedhur presidentin në Itali, transmeton Anadolu Agency.
Bëhet e ditur se 759 votat që mori Mattarella janë numri i 2-të më i lartë i votave që një president ka marrë në historinë e zgjedhjeve presidenciale në Itali. Numrin më të lartë e ka marrë Sandro Pertini në vitin 1978 me 832 vota.
