Kryetari i PSD-së, Dardan Molliqaj ka reaguar sërish për shtrenjtimin e energjisë elektrike, përcjell InLajmi.
Ai ka thënë se propozimi për shtrenjtim të energjisë elektrike duhet të kthehet mbrapsht, duke theksuar se ky është vullneti i qytetarëve.
Sipas Molliqajt në situatën që ndodhemi, ky propozim është absolutisht i papranueshëm dhe në kundërshtim me nevojat e qytetarëve të vendit tonë.
Postimi i plotë i tij:
Të dëgjohet vullneti i qytetarëve, të kthehet mbrapsht propozimi për shtrenjtim të rrymës
Pabarazia socio-ekonomike në Kosovë është shumë e thellë. Çmimet, përfshirë edhe ato të produkteve bazike ushqimore e higjienike janë rritur shumë tashmë. Familjet që i përkasin shtresës së varfër dhe asaj të ulët me vështirësi ia dalin në fund të muajit.
Në këtë situatë, propozimi për shtrenjtim të energjisë elektrike është absolutisht i papranueshëm dhe në kundërshtim të plotë me nevojat e qytetarëve të Kosovës.
Ky propozim, i cili është në diskutim publik deri nesër, u kundërshtua fuqishëm nga qytetarët e vendit. Prandaj, kërkojmë nga ZRRE që nesër të mos e aprovojë propozimin në fjalë e ta dëgjojë zërin e qytetarëve. Në të kundërtën, aksionet e protestat do të vazhdojnë deri sa ky vendim të kthehet prapa./InLajmi/
