Ditën e sotme po zhvillohen votimet në 6 bashki, për të përzgjidhur kandidatët e PD-së së Sali Berishës për zgjedhjet e pjesshme vendore që pritet të zhvillohen më 6 mars.
Procesi i votimit ka nisur që prej orës 08:00 në bashkitë Durrës, Vorë, Rrogozhinë, Shkodër, Dibër, Lushnjë dhe do të vijojë deri në orën 17:00.
Janë gjithsej 22 emrat që garojnë, por Komisioni i Rithemelimit do të nxjerrë vetëm 6 kandidatë. Komisioni i Rithemelimit thotë se në procesin e votimit po marrin pjesë të gjithë anëtarët e Partisë Demokratike.
Një ditë më parë Komisioni i Rithemelimit publikoi emrat e pretendentëve për kandidatë për kryetarë në 6 bashkitë. Pati edhe një reagim nga selia blu, ku u nënvizua se emrat e shpallur nga Komisioni i Rithemelimit nuk janë kandidatë të Partisë Demokratike, përcjell euronews.al.
654 538 qytetarë kanë të drejtë vote në zgjedhjet e pjesshme vendore. Ministria e Brendshme e Shqipërisë njofton se 10.134 zgjedhës votojnë për herë të parë. 135 qytetarë nuk janë përfshirë në lista për shkak të dekriminalizimit.
