Lidhja Demokratike e Kosovës këtë të shtune ka mbledhur kuvendin e jashtëzakonshëm për zgjedhjen e kryetarit të degës në Podujevë me aprovimin e 59 delegatëve, ndërsa lidhur me këtë vendim ka reaguar ashpër së fundmi ish kryetari i LDK-së në këtë komunë, Agim Veliu, përcjell InLajmi.
Deputeti Veliu ka deklaruar se ata që i dhanë goditjen e parë degës së LDK-së, në Podujevë, duke e zhveshur nga kompetenca kryetarin dhe kryesinë e degës, po vazhdojnë me avazin e tyre, shkatërrimin e degës.
Më tej, deputeti i LDK-së, ka thënë se nuk do të merr pjesë në këtë Kuvend i cili në mënyrë klandestine është organizuar gjatë natës, nga Lumir Abdixhiku, me misionarët e tij anti LDK të mbledhur rreth vetes.
Postimi i plotë i tij:
Të dashur veprimtarë, anëtarë dhe simpatizantë të Lidhjes Demokratike të Kosovës,
Ata që vitin e kaluar i dhanë goditjen e parë degës së LDK-së në Podujevë, duke e zhveshur nga kompetenca kryetarin dhe kryesinë e degës, po vazhdojnë misionin e tyre të shkatërrimit të degës.
Të njëjtit, në krye me kryetarin e partisë Lumir Abdixhiku, sërish duke shkelur mbi statutin e LDK-së, qenkan mobilizuar gjatë natës dhe në mënyrë klandestine paskan thirrur një Kuvend të jashtëzakonshëm të degës në Podujevë.
Duke qenë se kuvendi i sotëm është kundërstatutar dhe i paligjshëm, të dashur veprimtarë dhe anëtarë të LDK-së, ju njoftoj se nuk do të marr pjesë në një farsë të tillë, ku do të tentohet të kontrabandohet një kryetar i ri, që nuk është as pjesë e strukturave të degës sonë.
Kjo që po bën Abdixhiku, me misionarët anti LDK të mbledhur rreth vetes, nuk është asgjë tjetër veçse një proces i shkatërrimit të degës në Podujevë, bastionit të fundit të LDK-së./InLajmi/
