Kryetari i Prishtinës, Përparim Rama ka kujtuar 30 vjetorin e fillimit të mësimit në shtëpi që aso kohe quheshin ‘’shtëpitë-shkolla’’, që ishin prona private të shqiptarëve e që i vunë në shërbim për shkollim, përcjell InLajmi.
Rama tha se shtëpitë-shkolla kanë luajtur rol të madh për arsye se ato mbajtën gjallë gjuhën shqipe.
Këto shtëpi kanë shërbyer si vatra të dijes për lirinë e pavarësinë e Kosovës, që sot e gëzojmë.
Postimi i plotë i tij:
Shënojmë sivjet 30-vjetorin që kur, të kushtëzuara nga represioni i shtetit jugosllav, filluan të operonin ato që ne i quajtëm “shtëpitë-shkolla”, pronat private që njerëz atdhedashës e vetëmohues i vunë në shërbim të shkollimit të brezave në kohë pushtimi, e kështu edhe të të mirës gjithëpopullore.
Shtëpitë-shkolla luajtën rol të madh jo vetëm për ta mbajtë gjallë arsimin shqip, të cilin regjimi pushtues i kohës e mbylli dhe e ndaloi, por edhe për ta përforcu rezistencën kundër okupatorit serb, duke shërby si vatra të dijes, e si dritare të shpresës për lirinë dhe pavarësinë e vendit tonë.
Në këtë vit jubilar, një falënderim dhe mirënjohje tejet e madhe e fort e përzemërt u detyrohet, para së gjithash, vetë familjeve pronare për kontributin e tyre të jashtëzakontë, përkundër rreziqeve që u kanoseshin. Këto familje i shndërruan shtëpitë e tyre në vatra të diturisë e të qëndresës, duke ndërmarë një akt aq fisnik, e aq bujar, që na i thek zemrat edhe sot që e kujtojmë pas kaq kohësh./InLajmi/
