Deputeti i Partisë Demokratike të Kosovës, Bekim Haxhiu në seancën e Kuvendit ku po debatohet për pandeminë në vend ka deklaruar se partia prej nga vjen ai qysh në fillim i ka dhënë ide dhe propozime se si të menaxhohet pandemia, por një gjë e tillë është injoruar nga Qeveria e Kosovës, raporton InLajmi.
Më tej Haxhiu ka kërkuar nga Qeveria e Kosovës që t’i rishikojë me urgjencë masat e reja.
“Masa për 3 dozat të vaksinës po i izolon dhe bllokon shumë qytetarë. Është goditja më e madhe që po i bëhet procesit të vaksinimit. Cila është logjika që fitneset dhe qendrat sportive, po ashtu gastronomia të mbyllen. A qenkan ato vatra të infeksionit. Kërkoj me urgjencë ti rishikoni masat e reja”,ka thënë Haxhiu.
Deputeti i PDK-së, po ashtu është ankuar lidhur me injorimin që i është bërë atij nga ana e Ministrisë së Shëndetësisë.
“Ka më shumë se një muaj qasje në dokumentet publike, të kem qasje për çerifikatat e analizave. Sa është numri i importuar i vaksinave, çfarë lloji janë. Sa vaksinave ju ka skaduar afati. Sa janë në stok dhe sa është afati i tyre. Duke bërë këto të dhëna publike, rritet vetëbesimi i qytetarëve për vaksinim”,shtoi tutje Haxhiu.
Brengosëse sipas tij është fakti se ende nuk ka strategji të menaxhimit të pandemisë nga Qeveria Kurti./InLajmi/
