Ministri i Shëndetësisë, Rifat Latifi, ka raportuar në Komisionin për Shëndetësi dhe Mirëqenie Sociale, lidhur me menaxhimin e situatës epidemiologjike me koronavirus në vend, raporton InLajmi.
Latifi në këtë Komision ka theksuar se nuk ka neglizhencë sa i përket kësaj çështje.
“Numri i atyre që kërkojnë ndihmë mjekësore në spitale është më i ulët dhe i menaxhueshëm. Jemi në vlerësim në çdo orë lidhur me situatën e përgjithshme, kapacitetet humane dhe infrastrukturën spitalore të atyre që kërkojnë ndihmë në spitale”,u shpreh Latifi.
Ministri i Shëndetësisë më tej ka thënë se ka pasur administrim të mirë sa i përket menaxhimit të pandemisë.
“Ka qenë e pritur të rritet numri i rasteve me koronavirus. Edhe përkundër numrit të madh të rasteve në vend, përsëri mund të them se jemi më mirë në krahasim me vendet e rajonit, ta zëmë Sllovenia brenda një dite po shënon mbi 5.000 raste, po ashtu edhe vendet e tjera të rajonit”,ka thënë Latifi.
Ndërsa në këtë mbledhje ku po diskutohet për menaxhimin e pandemisë së koronavirusit, Armend Zemaj, deputeti i LDK-së ka insistuar të dijë se sa është numri i vaksinave kundër gripit sezonal që janë dhënë deri më tash.
Ministri Latifi ia ka kthyer përgjigjen menjëherë Zemajt.
“Sot nuk kam të dhëna lidhur me vaksinimin e qytetarëve me vaksinën kundër Gripit sezonal, sepse kam menduar se do të diskutohet vetëm për menaxhimin e koronavirusit”,tha Latifi.
Ndryshe, përfaqësues të IKSHPK-së kanë thënë se asnjëherë nuk janë ndalur në punën kundër luftimit të koronavirusit. /InLajmi/
