Presidentja e Kosovës, Vjosa Osmani, ka reaguar për progresin që ka shënuar Kosova në indeksin e antikorrupsionit që u publikua nga organizata “Transparency International”, përcjell InLajmi.
Osmani lidhur me këtë progres që është shënuar në indeksin e antikorrupsionit, thekson se ky ka qenë prioritet kryesor i qeverisë dhe tani edhe po shihen rezultatet, të cilat janë premtuese.
Presidentja e vendit thekson se vetëm vitin e kaluar Kosova ka shënuar një rritje prej 17 pozitave në publikimin e “Indeksit të Përceptimit të Korrupsionit” për vitin 2021, e që kjo sipas saj është ngritja më e lartë për Kosovën në historinë e publikimit të Indeksit.
Në fund Osmani premton se hap pas hapi do të punojnë në çrrënjosjen e korrupsionit.
Postimi i plotë i saj:
Para një viti premtuam që luftimi i korrupsionit do të ishte një prej prioriteteve kryesore të institucioneve të reja. Sot, ky premtim po sheh rezultatet e para jashtëzakonisht premtuese.
Gjatë vitit që lamë pas, Republika e Kosovës shënoi rritje prej 17 pozitave në publikimin e Indeksit të Perceptimit të Korrupsionit për vitin 2021 të Transparency International – ngritja më e lartë vjetore për Kosovën në historinë e publikimit të Indeksit.
Hap pas hapi, drejt çrrënjosjes së korrupsionit. /InLajmi/
