Një stuhi e fortë dëbore ka ndërprerë trafikun ajror dhe rrugor në kryeqytetin grek të Athinës dhe në qytetin fqinj më të madh të Turqisë, Stambollin, transmeton InLajmi.
Reshjet e dendura të borës dhe rënia e temperaturave kanë shkaktuar probleme të shumta në Greqi, ku qeveria ka vendosur trupa për të ndihmuar në pastrimin e rrugëve dhe largimin e mijëra automjeteve të bllokuara në periferi të Athinës.
Edhe pse autoritetet kishin paralajmëruar banorët që të shmangnin lëvizjet e panevojshme, mijëra grekë dolën sërish në rrugë me automjetet e tyre, por pa zinxhirë apo goma dimri, duke krijuar kaos në trafik.
Gjithashtu autoritetet turke në Stamboll, me një metropol prej 16 milionë banorësh, pezulluan shërbimin e autobusëve dhe bllokuan përkohësisht udhëtimin në qytet nga rajoni i Trakës së Turqisë.
Në Turqi njerëzit që ishin bllokuar në rrugë braktisnin automjetet për të ecur në shtëpi. Shkollat kanë ndërprerë mësimin, gjithashtu edhe universitetet kanë ndërprerë mësimet për 2 ditë. Zyrat publike dhe qendrat tregtare u mbyllën herët.
Edhe autoritetet greke vendosën të martën mbylljen e të gjitha bizneseve në zonat e prekura, ndërsa të gjithë mekanizmat shtetërorë janë vënë në gatishmëri të plotë, shkruan Abc.news.
Qeveria greke ka njoftuar punonjësit e administratës publike se për shkak të situatës së rënduar mund të mos shkojnë në punë ditën e martë. /InLajmi/
